विरेन्द्र सहवागको विष्फोटक ब्याटिङमा भारत लेजेन्ड्सले रोड सेफ्टी विश्व टी २० सिरिजमा बंगलादेश लेजेन्ड्सलाई १० विकेटले हराएको छ।
बंगलादेशले दिएको १ सय १० रनको लक्ष्य पछ्याएको भारत लेजेन्ड्सले १०.१ ओभरमा कुनै विकेट नगुमाई पूरा गर्यो। भारतका लागि विरेन्द्र सहवागले ३५ बलमा १० चौका र ५ छक्का सहित ८० रन बनाए भने कप्तान सचिन तेन्दुलकरले २६ बलमा ५ चौका सहित ३३ रन बनाए।
त्यसअघि शहिद वीर नारायण सिंह अन्तर्राष्ट्रिय स्टेडियम रायपुरमा टस जितेर पहिला ब्याटिङ गरेको बंगलादेश १९.४ ओभरमा १ सय ९ रनमा अल आउट भएको थियो।
बंगलादेशका लागि नाजिमुद्दीनले ३३ बलमा ८ चौका र १ छक्का सहित सर्वाधिक ४९ रन बनाएका थिए। जावेद ओमर र राजेन सालेहले १२–१२ रन बनाए।
भारतका लागि युवराज सिंह, प्रज्ञान ओझा र विनय कुमारले समान २–२ विकेट लिए।
प्रतियोगितामा भारत, बंगलादेश, श्रीलंका, दक्षिण अफ्रिका, इंग्ल्यान्ड र वेस्टइन्डिजका लेजेन्डसबीच प्रतिस्पर्धा हुनेछ।
