श्रीलंकाविरुद्धको तीन खेलको एकदिवसीय सिरिज घरेलु टिम इंग्ल्यान्डले एक खेल अघि नै जितेको छ।
बिहीबार भएको दोस्रो खेलमा ८ विकेटको जित निकाल्दै इंग्ल्यान्डले सिरिज कब्जा गरेको हो। यसअघि पहिलो सिरिजमा इंग्ल्यान्ड ५ विकेटले विजयी भएको थियो।
पहिले ब्याटिङ गरेको श्रीलंकाले ९ विकेटको क्षतिमा २४१ रन जोड्यो। उसका लागि धनन्जय डि सिल्भाले ९१ रन र डसुन सनकाले ४७ रन बटुले।
बलिङमा इंग्ल्यान्डका साम कुरानले ५ विकेट लिए। उनले १० ओभरमा १ मेडन राख्दा ४८ रन खर्चिए। डेभिड विलीले पनि ४ विकेटको योगदान दिए।
२४२ रनको विजयी लक्ष्य इंग्ल्यान्डले ४३ ओभरमा २ विकेटको क्षतिमा पार गर्यो। उसका लागि जासन रोएले ६० रन जोड्दा जोए रुटले नटआउट ६८ रन र कप्तान इयान मोर्गानले नटआउट ७५ रन जोडे।
