अस्ट्रेलियालाई लगातार तेस्रो खेलमा हराउँदै बंगलादेशले पाँच खेलको टी-२० अन्तर्राष्ट्रिय सिरिज ३-० ले जितेको छ।
शेरे बांग्ला नेसनल स्टेडियम, ढाकामा सम्पन्न तेस्रो खेलमा अस्ट्रेलियालाई १० रनले हराउँदै ऐतिहासिक सफलता हात पारेको हो।
बंगलादेशले दिएको १२८ रनको सामान्य लक्ष्य पछ्याएको अष्ट्रेलिया निर्धारित २० ओभरमा ४ विकेट गुमाउँदै ११७ रन मात्र बनाउन सक्यो।
अष्ट्रेलियाका लागि मिचेल मार्शले ५१ रनको अर्धशतकीय इनिङ्स खेले पनि टोलीलाई जित दिलाउन सकेनन्। यस्तै बेन म्याकडेरमोटले ३५ रन बनाए ।
एलेक्स केरी २० रनमा अविजित रहदा डान क्रिस्टियन ७ रनमा अविजित रहे ।
बंगलादेशका लागि शोरीफूल इस्लामले २ विकेट लिए। नसुम अहमेद र शकिब अल हसनले १/१ विकेट हात पारे।
यसअघि पहिले ब्याटिङ गरेको बंगलादेशले २० ओभरमा ९ विकेट गुमाएर १ सय २७ रन बनाएको थियो ।
बंगलादेशका लागि कप्तान महमुद उल्लाहले ५२ रनको अर्धशतकीय इनिङ्स खेले । यस्तै शकिब अल हसनले २६ रन जोड्दा आफिफ होसेनले १९ र नुरुल होसेनले ११ रन बनाए ।
अष्ट्रेलियाका डेब्यु खेलाडी नाथन एलिसले ह्याट्रिक विकेट लिए ।
नाथनले टी-ट्वान्टी अन्तर्राष्ट्रियको डेब्यु खेलमा ह्याट्रिक विकेट लिने पहिलो खेलाडीको कीर्तिमान समेत बनाए। नाथनले १९ ओभरको अन्तिम तीन बलमा विकेट लिदै ह्याट्रिक पूरा गरेका हुन् ।
त्यस्तै जोस हाजलउड र एडम जाम्पाले २/२ विकेट लिए ।
यससँगै बंगलादेशले अष्ट्रेलियाविरुद्धको पाँच खेलको सिरिज दुई खेल अगावै ३-० ले जितेको छ। यसअघि बंगलादेशले पहिलो खेलमा अष्ट्रेलियालाई २३ रन तथा दोस्रो खेलमा ५ विकेटले हराएको थियो ।
अष्ट्रेलियाविरुद्धको सिरिजमा बंगलादेशको यो पहिलो ऐतिहासिक सिरिज जित हो। यसअघि बंगलादेशले अष्ट्रेलियाविरुद्ध कुनै पनि फर्म्याटको सिरिज जितेको थिएन।
