अष्ट्रेलियाका नाथन एलिस टी-ट्वान्टी अन्तर्राष्ट्रियको डेब्यु खेलमा ह्याट्रिक विकेट लिने पहिलो खेलाडी बनेका छन्। बंगलादेशको ढाकामा जारी बंगलादेशविरूद्धको तेस्रो टी-ट्वान्टीमा नाथनले ह्याट्रिक विकेट लिदै नयाँ कीर्तिमान बनाएका हुन् ।
अष्ट्रेलियाका लागि पहिलो टी-ट्वान्टी खेलिरहेका २६ वर्षीय नाथनले १९ ओभरको अन्तिम तीन बलमा लगातार विकेट लिँदै ह्याट्रिक पूरा गरेका हुन्।
उनले १९ ओभरको चौंथो बलमा ममुदउल्लाह, पाँचौ बलमा मुताफिजुर रहमान र छैठौं बलमा मेहेदी हसनलाई आउट गरेका थिए।
नाथन अष्ट्रेलियाका लागि टी-ट्वान्टी अन्तर्राष्ट्रिय ह्याट्रिक पूरा गर्ने तेस्रो बलर हुन्। यस अघि ब्रेट ली र एस्टन अघरले ह्याट्रिक लिएका छन् ।
नाथनले कीर्तिमान बनाएको खेलमा बंगलादेशले अष्ट्रेलियालाई १० रनले हराउँदै ऐतिहासिक सिरिज जितेको छ।
