इंग्ल्यान्ड भ्रमणमा रहेको भारतका लागि केएल राहुलले शतक प्रहार गर्दा पाँच टेस्टको सिरिज अन्तर्गत बिहिबार सुरू भएको दोस्रो टेस्टको पहिलो दिन सकिँदासम्म भारतले उत्कृष्ट सुरूवात गरेको छ।
लर्ड्स मैदानमा टस हारेर पहिले ब्याटिङ गरेको भारतले दिनको समाप्तिसम्ममा ३ विकेट गुमाएर २७६ रन बनाएको छ। क्रिजमा १२७ रन बनाएर केएल राहुल र १ रन बनाएर अजिंके रहाणे अविजित छन्।
करियरको छैठौं शतक बनाउने क्रममा राहुलले २४८ बलमा १२ चौका र १ छक्का प्रहार गरे।
यसअघि रोहित शर्मासँग राहुलले १२६ रनको ओपनिङ साझेदारी गर्दै उत्कृष्ट सुरूवात दिलाए। रोहित १४५ बलमा ११ चौका र १ छक्का मद्दतले ८३ रनमा आउट भएपछि साझेदारी टुटेको थियो।
भारतीय ओपनरले सन् २०१० डिसेम्बर पछि भारतबाहिर शतकीय साझेदारी गरेको पहिलो पटक हो। पछिल्लो पटक दक्षिण अफ्रिका विरूद्ध भारतले सेन्चुरियनमा विरेन्द्र सेहवाग र गौतम गम्भीरले १३७ रनको सतकीय साझेदारी गरेका थिए।
त्यस्तै दोस्रो विकेटका रूपमा चेतेश्वर पुजारा ९ रन बनाएर आउट भए। तेस्रो विकेटको लागि राहुलले कप्तान बिराट कोहलीसँग पनि शतकीय साझेदारी गरे। ११७ रनको साझेदारी गरेपछि कोहली व्यक्तिगत ४२ रनमा आउट भए। कोहलीले १०३ बलमा ३ चौकासहित ४२ रन बनाए। कोहलीको विकेट पछि रहाने र राहुलले अविजित ९ रनको साझेदारी गरेका छन्।
इंग्ल्याण्डका लागि जेम्स एण्डरसनले २ तथा ओली रोबिन्सनले १ विकेट लिए।
