आइसिसी विश्वकप लिग-२ अन्तर्गत अहिले नेपाल र ओमानबीच खेल भइरहेको छ।
अल अमिरत क्रिकेट रंगशालामा जारी खेलमा टस जितेर पहिले ब्याटिङ गरिरहेको नेपालका लागि ओपनिङ ब्याट्सम्यान आसिफ शेखले अर्धशतक प्रहार गरेका छन्।
उनले अर्धशतक प्रहार गर्ने क्रममा ६४ बलमा ५ चौका प्रहार गरे।
यो उनको एकदिवसीय खेलमा पहिलो अर्धशतक हो।
त्यसअघि ओपनर कुशल भुर्तेल शून्यमा आउट हुँदा कप्तान ज्ञानेन्द्र मल्लले २१ रन जोडेका छन्। ज्ञानेन्द्रले ३३ बलमा १ चौका हिर्काए।
अहिले आसिफ शेख र रोहितकुमार पौडेल ब्याटिङ गरिरहेका छन्।
लिग-२ मा नेपालले ओमानसँग दुई खेल खेलिसकेको छ। सन् २०२० को फेब्रुअरीमा नेपालमा भएको सिरिजमा ओमानले नेपाललाई ८ विकेट र १८ रनले पराजित गरेको थियो।
हिजोदेखि ओमानमा सुरु भएको नेपाल, अमेरिका र ओमाबीचको त्रिकोणात्मक सिरिजमा नेपालले विजयी सुरूवात गरिसकेको छ।
पहिलो खेलमा नेपालले अमेरिकालाई ५ विकेटले पराजित गर्यो। नेपालको जितमा ओपनर कुशल भुर्तेल र मध्यक्रमका ब्याट्सम्यान रोहितकुमार पौडेलले अर्धशतक प्रहार गरे।
सिरिजमा नेपालले ओमान र अमेरिकासँग दुई-दुई खेल खेल्नेछ।
