आइसिसी विश्वकप लिग-२ अन्तर्गत नेपालले अहिले अमेरिकासँग प्रतिस्पर्धा गरिरहेको छ।
ओमानको अल अमिरत रंगशालामा अमेरिकाले टस जितेर फिल्डिङ गर्ने निर्णय गरेपछि पहिले ब्याटिङ गरेको नेपालले एक विकेट गुमाइसकेको छ।
ओपनिङ ब्याट्सम्यान आसिफ शेख ३ रन बनाएर आउट भएका छन्। आसिफ तेस्रो ओभरमा केल फिलिप्सको बलमा करिमा गोरेबाट समातिएका छन्।
अहिले कुशल भुर्तेल र ज्ञानेन्द्र मल्ल ब्याटिङ गरिरहेका छन्।
सिरिजमा यसअघि नेपालले पहिलो खेलमा अमेरिकालाई ५ विकेटले पराजित गरेको थियो। दोस्रो खेलमा नेपाल ओमानसँग ५ विकेटले नै हारेको थियो।
विश्वकप लिग–२ मा नेपालसहित पपुवा न्यूगिनी, ओमान, अमेरिका, स्कटल्याण्ड, नामिबिया र युनाइटेड अरब इमिरेटस् (युएई) रहेका छन्।
नेपालले हालसम्म ओमान र अमेरिकासँग तीन-तीन खेल खेलिसकेको छ। नेपाल ६ अंक जोड्दै अंक तालिकाको छैटौं स्थानमा छ।
ओमान १२ खेलबाट २० अंक जोड्दै शीर्ष स्थानमा छ। दोस्रो स्थानको अमेरिकाको १४ खेलबाट १२ अंक छ।
