नेपाली राष्ट्रिय क्रिकेट टिमको प्रमुख प्रशिक्षक पदका लागि ६० जनाले आवेदन दिएका छन्।
नेपाल क्रिकेट संघ (क्यान) को छनोट समितिले ६० जनाले आवेदन दिएको जानकारी दिएको छ। समितिले केही दिनमा सर्टलिस्ट गर्ने र सर्टलिस्टमा परेकालाई अन्तर्वार्ता लिने जनाएको छ।
यसअघि क्यानले कात्तिक १ मा राष्ट्रिय क्रिकेट टिमको प्रमुख प्रशिक्षकका लागि दरखास्त आह्वान गरेको थियो।
डेभ वाटमोरले राजीनामा दिएपछि नेपाली टिमको प्रशिक्षक पद खाली छ।
वाटमोरले सम्झौता अवधि नसकिँदै गत महिना राजीनामा दिएका थिए।
क्यानले प्रशिक्षकका लागि इसीबी/सीए लेभल-३ कोर्ष गरेको, आइसिसीको स्थायी सदस्य वा एसोसिएट सदस्य वा पहिलो श्रेणीको टिमका लागि पाँच वर्ष प्रशिक्षण गरेको अनुभव भएको प्रशिक्षकले दरखास्त दिन सक्ने जनाएको थियो।
