आगामी जनवरी दोस्रो साता आईसीसी यु-१९ पुरूष विश्वकप क्रिकेट वेस्ट इन्डिजमा हुने भएको छ।
अन्तर्राष्ट्रिय क्रिकेट परिषद् (आईसीसी) ले बुधबार सार्वजनिक गरेको खेल तालिका अनुसार १४ औं संस्करणको युवा विश्वकप वेस्ट इन्डिजले आयोजना गर्ने भएको हो।
१६ राष्ट्र सहभागी विश्वकप २०२२ को जनवरी १४ देखि फेब्रुअरी ५ सम्म आयोजना हुनेछ।
आईसीसीले सहभागी १६ राष्ट्रलाई चार समूहमा विभाजन गरेको छ।
नेपालको दुर्भाग्य
अन्तर्राष्ट्रिय क्रिकेट परिषद् (आईसीसी) ले यू-१९ पुरुष क्रिकेट विश्वकपको एसिया छनोट रद्द गरेसँगै नेपालले यू-१९ विश्वकप खेल्न नपाएको हो। आईसीसीले कोरोना महामारीका कारण एसिया छनोट रद्द गरेको थियो।
कोभिडको कारण देखाउँदै आईसीसीले एसिया, अमेरिका र इएपीए छनोट रद्द गरेको हो। यू-१९ एसिया छनोट नहुने भएपछि पछिल्लो पाँच विश्वकप छनोटका आधारमा एसिया यू-१९ छनोटबाट यूएईले सिधै यू-१९ विश्वकपमा स्थान बनाएको छ।
अमेरिका छनोटतर्फबाट क्यानडा र इएपीए छनोटबाट पपुपा न्युगिनीले २०२२ मा हुने यू-१९ विश्वकपमा खेल्ने भएका छन्। आईसीसीले पछिल्ला पाँच यू-१९ विश्वकप छनोटको प्रदर्शनका आधारमा यी टोलीहरूलाई सिधै मौका दिएको जनाएको छ ।
एसिया छनोटमा नेपालसहित यूएई, कुवेत, मलेसिया, सिंगापुर र ओमानले प्रतिस्पर्धा गर्ने तय भएको थियो। पछिल्ला पाँच संस्करणमा यूएई र नेपालले दुई–दुई पटक विश्वकपमा सहभागिता जनाएका थिए ।
२०१९ मा मलेसियामा भएको यू-१९ विश्वकप एसिया छनोटमा यूएई पाँच खेलमा १० अंकका साथ शीर्ष स्थानमा रहँदै विश्वकपमा स्थान बनाएको थियो । नेपाल उक्त प्रतियोगिता यूएईसँग वर्षाका कारण डकवर्थ लेबिस पद्धतिका आधारमा एक रनले पराजित भएपछि दोस्रो स्थानमा रहँदै बाहिरिएको थियो। उक्त एक रनको हार २०२२ को विश्वकपमा पनि बाधक बन्यो।
नेपालले २००० देखि ८ सम्म पाँच संस्करण विश्वकप लगातार खेलेको थियो । २००६ मा न्युजिल्यान्डलाई हराउँदै प्लेट च्याम्पिन नै बनेको थियो । २००८ मा प्लेट च्याम्पियनसिपको फाइनलमा वेस्ट इन्डिजसँग पराजित भएको थियो।
न्युजिल्याण्डले नखेल्ने
न्युजिल्याण्डले आईसीसी यू-१९ पुरुष एकदिवसीय विश्वकप क्रिकेट नखेल्ने भएको छ।
कोरोना महामारीको कारण घर फर्किएपछि अनिवार्य क्वारेन्टिनमा बस्नुपर्ने भएपछि न्युजिल्याण्डले विश्वकपबाट नाम फिर्ता लिएको हो।
न्युजिल्याण्डको अनुपस्थितिमा स्कटल्याण्डले विश्वकप खेल्ने मौका पाएको छ।
कुन समूहमा कुन टोली
- समूह 'ए' - बंगलादेश, इंग्ल्यान्ड, क्यानडा र युएई
- समूह 'बी' -भारत, आयरल्याण्ड,दक्षिण अफ्रिका र युगान्डा
- समूह 'सी' - अफगानिस्तान,पाकिस्तान, पपुवा न्युगिनी र जिम्बावे
- समूह 'डी'- अष्ट्रेलिया, स्कटल्याण्ड, श्रीलंका र वेस्ट इन्डिज
