स्पेनिस ला लिगामा बार्सिलोनाले आफ्नो अपराजित यात्रा कायम राखेको छ। लिग अन्तर्गत शनिबार राति भएको खेलमा लिग लिडर बार्सिलोनाले एथ्लेटिको बिल्बाओलाई २–० ले हराउँदै आफ्नो अपराजित यात्रा कायम राखेको हो।
बार्सिलोनालाई जिताउन लियोनल मेसी र पाउलिन्होले गोल गरेका थिए। यो सिजन लिगमा १२ गोल गरिसकेका मेसीले खेलको ३६ औं मिनेटमा गरेको गोलबाट बार्साले अग्रता लिएको थियो।
दोस्रो हाफको इन्जुरी समयमा पाउलिन्होलो गोल गर्दै बार्सिलोनालाई २–० को महत्वपूर्ण जित दिलाए।
जितपछि शीर्ष स्थानको बार्सिलोनाको १० खेलबाट २८ अंक भएको छ। यस्तै समान खेल खेलेको भ्यालेन्सिया २४ अंकसहित दोस्रो स्थानम छ। बार्सिलोना तेस्रो स्थानमा रहेको रियल मड्रिड भन्दा ८ अंकले अघि छ। एक खेल कम खेलेको मड्रिडको २० अंक छ।
यस्तै गएराति भएका अन्य खेलहरूमा एलाभेसलाई भ्यालेन्सियाले २–१ ले हरायो। लेगानेसलाई २–१ ले नै हराएको सेभिल्ला १० खेलबाट १९ अंकसहित पाँचौं स्थानमा उक्लिएको छ। राति नै भएको अर्को खेलमा एथ्लेटिको मड्रिड भने बराबरीमा रोकियो। एथ्लेटिको मड्रिडले भिल्लारियलसँग १–१ को बराबरी खेल्दै अंक बाँडेको हो।
