एएफसी एसियन कपका पछिल्ला दुई खेलमा चोट कारण अनुपस्थित अनिल गुरूङले भोलि नेपाली टोलीको नेतृत्व गर्नेछन्।
अनिलले भोलि फिलिपिन्सविरुद्धको खेलसँगै अन्तर्राष्ट्रिय खेल जीवनबाट सन्याश लिने यसअघिनै घोषणा गरिसकेका छन्।
यद्यपी उनले आफ्नो अन्तिम खेल सुखद हुने अपेक्षा राखेका छन्। फिलिपिन्सलाई हराउने नेपाली टोलीमा क्षमता रहेको भन्दै उनले भोलि नेपालका लागि जितको बिकल्प नभएको बताउँछन्। ‘फिलिपिन्स हामीभन्दा धेरै बलियो टोली हो यो अहिले मात्रै हैन पहिले देखि नै हो ’ कप्तान गुरुङले सोमबार आयोजित पत्रकार सम्मेलनमा भने, ‘समूहमा नेपाल पुछारमा रहे पनि मंगलबारको खेल नेपालको लागि महत्वपूर्ण छ। उनीहरुलाई जित्न मिहेनत गर्नुपर्छ ।’
उनले लामो समयदेखि घरेलु लिग नहुँदा राष्ट्रिय टिमको खेलाडी छनोटमा एकरूपता भएकाले पनि नेपालको नतिजामा कमजोरी आएको तथ्य स्वीकार गरे।
नेपालले भोलिको खेलमा आफ्नो खेल रणनीति परिवर्तन गर्ने भएको छ। ‘पछिल्ला केहि खेलहरूमा ५–३–२ को फर्मेसनमा खेलेको नेपालले भोलिको खेल ४–४–२ को फर्मेसनमा खेल्नेछ। नयाँ फर्मेसन टोलीका लागि केही फरक हुनेछ तर यसले प्रदर्शनमा ठूलो असर गर्ने छैन,’ कप्तान गुरूङदे भने।
नेपाली टोलीका मुख्य प्रशिक्षक ग्योतोकु कोजीले, भोलि हुने खेल नेपालका लागि विगतका कमजोरी सुधार गर्ने मौका भएको बताए। उनले थपे, ‘गत मार्चमा बेहोरेको फराकिलो हार बिर्साउन पनि नेपालले फिलिपिन्सविरुद्ध जितको लक्ष्य लिएको छ।’ डिफेन्स र मिडफिल्डमा हुने गल्तीलाई सुधार्दै नयाँ शैलीले नेपाल मैदान उत्रिनेछ, कोजीले स्पष्ट पारे।
यसैबीच फिलिपिन्सका प्रशिक्षक थोमस डोलीले पनि नेपाली टिमलाई आफूहरूले कडा दाबेदारको रूपमा लिएको बताए। उनले भने, ‘नेपाली टोलीले अहिले निकै मेहनत गरिरहेको छ यसर्थ हामीले यो खेललाई सहज लिएका छैनौँ। उनले समूहको शीर्ष स्थान रहेर एशियन कपमा छनोट हुनु खुशीको कुरा भएको समेत बताए।
नेपाली हावापानी र तापक्रम आफूहरूलाई अनुकूल रहेको फिलिपिन्सका कप्तान फिलिप जेम्सले बताए। उनले आफ्नो टिमका केही खेलाडीहरू चोटग्रस्त रहेकोले टिमलाई दबाब पर्न सक्ने तर समग्र खेलमा त्यसले कुनै ठूलो असर नपर्ने धारण व्यक्त गरे।
छनोटको समूह ‘एफ’ अन्तर्गत रहेको नेपालको चौथो खेलमा ताजिकिस्तानसँग ३–० ले पराजित भएसँगै अघिल्लो चरणको यात्रा सकिएको थियो। छनोट चरणबाट बाहिरिसकेको नेपालले फिलिपिन्ससँग प्रतिष्ठाका लागि मात्र खेल्नेछ। फिलिपिन्स समूहको शीर्ष स्थानमा रहेको छ।
गत मार्च महिनामा मनिलामा भएको खेलमा भने नेपाल ४–१ गोलले पराजित भएको थियो।
एक अंकसहित अंक तालिकाको पुछारमा रहेको नेपाल ८ अंकसहित समूहको शीर्ष स्थानमा रहेको टिमसँग प्रतिस्पर्धा गर्नु सहज छैन। भोलि नेपाललाई पराजित गर्न सके फिलिपिन्स पहिलो पटक एसियन कपको लागि छनोट हुनेछ। समूहमा यमन र ताजकिस्तानको समान ६ अंक छ।
नेपाली राष्ट्रिय फुटबल टोलीगोलकिपर : किरण चेम्जोङ, विकेश कुथ, विशाल श्रेष्ठ
रक्षक: विराज महर्जन, रोहित चन्द, अनन्त तामाङ, कमल श्रेष्ठ, जितेन्द्र कार्की,राजेन्द्र रावल, दीनेश राजवंशी
मिडफिल्डर: सुजल श्रेष्ठ, विशाल राई, विक्रम लामा, अन्जन विष्ट, जगजित श्रेष्ठ, हेमन गुरुङ, हेमन्त थापा मगर,सुनिल बल
फरवार्ड: भरत खवास, विमल घर्तीमगर,अनिल गुरुङ, नवयुग श्रेष्ठ, जर्ज प्रिन्स कार्की
