इंग्लिस प्रिमियर लिग फुटबल अन्तर्गत मंगलबार राति भएको खेलमा उपाधिको दौडमा रहेको टोटनह्याम लेस्टर सिटीसँग पराजित भएको छ।
लेस्टर सिटीको घरेलु मैदानमा भएको खेलमा टोटनह्याम २–१ ले पराजित भएको हो । लेस्टरलाई जिताउन जेमी भर्डी र रियाद महरेजले गोल गरेका थिए। टोटनह्यामका लागि ह्यारी केनले गोल फर्काए पनि त्यसले हार जोगाउन सकेन।
खेलको १३ औं मिनेटमा भर्डीले गोल गर्दै लेस्टरलाई सुरुवाति अग्रता दिलाएका थिए। पहिलो हाफको इन्जुरी समयमा महरेजले गोल गरेपछि लेस्टरले पहिलो हाफमै २–० को अग्रता लियो।
टोटनह्यामका लागि खेलको ७९ औं मिनेटमा केनले गोल गरेका थिए। यद्यपी उनको गोलले घरेलु टोलीलाई रोक्न सकेन। टोटनह्यामले गोल गर्ने केही राम्रा मौका गुमाएको थियो। गएरातिको हारपछि पाँचौँ स्थानको टोटनह्यामको १४ खेलबाट २४ अंक छ। १४ औं स्थानको लेस्टर सिटीको १७ अंक भएको छ ।
एक खेल कम खेलेको म्यान्चेष्टर सिटि ३७ अंकसहित शीर्ष स्थानमा कायमै छ। यस्तै १४ खेल खेलेको म्यान्चेस्टर युनाइटेड ३२ अंकसहित सिटीलाई पछ्याइरहेको छ। २६ अंक भएको चेल्सी तेस्रो र २५ अंक भएको आर्सनल चौथो स्थानमा छन्।
