विभागीय टोली नेपाल पुलिस क्लब पोखरामा जारी आहा-रारा गोल्ड कपको क्वार्टर फाइनलमा प्रवेश गरेको छ।
शुक्रवार पोखरा रंगशालामा भएको अन्तन्त कडा प्रतिशर्धामा पूर्वेली क्लब झापा ११लाई १-० गोल अन्तरमा हराउँदै अन्तिम आठमा स्थान पक्का गरेको हो।
पुलिसलाई जिताउन सुमन लामाले खेलको १२औं मिनेटमा गरेको गोल नै निर्णायक भयो।
खेलको १३ औं मिनेटमा लामाले गोल गर्दै पुलिसलाई दिलाएको अग्रता टोलीले खेलको अन्तिम समय सम्म जोगाउन सफल भयो।
पुलिसले २९ औं मिनेटमा अग्रता दोब्बर गर्ने अवसर पाए पनि अन्मार्कड रवी पासवानको प्रहार झापाका किपर किशोर गिरीले बचाए।
झापाले पाएका केही राम्रा अवसरलाई गोलमा परिणत गर्न नसक्दा घर फर्कन बाध्य भयो।
पुलिसले अब क्वाटर फाइनलमा मनाङको सामना गर्नेछ।
झापाले २८ औं मिनेटमा लगातार ३ कर्नर पाएपनि त्यसलाई सदुपयोग भने गर्न सकेन। भोला सिलवाल र जुमानु राईलाई बेञ्चमा राखेको पुलिसले युवा खेलाडीका साथमा बलियो देखियो।
दोस्रो हाफमा झापाले पोसेसन राखे पनि गोल गर्ने राम्रो अवसर भने सिर्जना गर्न सकेन। पुलिसले दोस्रो हाफमा गोल गर्ने राम्रो अवसरहरु गुमायो। रवी पासवानले ५६ औं मिनेटमा गरेको क्रसमा अविशेक रिजालको हेडर बाहिरिएपछि पुलिसले अग्रता दोब्बर गर्ने अवसर गुमाएको थियो।
झापाले मिडफिल्डमा पकड जमाएपनि झापाका स्ट्राइकरहरु चलन सकेनन्। झापाका स्ट्राइकर विशाल राई यस प्रतियोगितामा सहभागी भएनन्।
प्रतियोगिता अन्तर्गत भोलि पहिलो क्वाटर फाइनलमा बंगलादेशको उत्तर बरिनधारा र सुदूरपश्चिम भिड्ने छन्।
