आर्मीलाई पेनाल्टीमा रोक्दै एपिएफले उपाधि उचाल्यो

प्रधानसेनापति कप महिला फुटबल

नारायण महर्जन

काठमाडौं, मंसिर १२

राजधानीमा जारी छैठौं संस्करणको प्रधानसेनापति अन्तर्राष्ट्रिय आमन्त्रण महिला फुटबल प्रतियोगिताको उपाधि एपीएफले जितेको छ।

विभागीय डर्बीमा बुधबार आर्मीलाई पेनाल्टी सुटआउटमा पराजित गर्दै एपीएफले उपाधि रक्षा गरेको हो। काठमाडौंको भद्रकालीस्थित आर्मीको खेल मैदानमा भएको खेलमा एपीएफ पेनाल्टी सुटआउटमा ४-२ ले विजयी बन्यो।

उपाधिसँगै एपीएफले ३ लाख नगद प्राप्त गरेको छ। उपविजेता बनेको आर्मीले १ लाख ५० हजारमा चित्त बुझायो। निर्धारित र अतिरिक्त समयको खेल १-१ गोलको बराबरीमा सकिएपछि निर्णय पेनाल्टी सुटआउटबाट गरिएको थियो।

पेनाल्टी सुटआउटमा एपीएफका साबित्रा भण्डारी, रेनुका नगरकोटी, अनु लामा र अनिता बस्नेतले गोल गरिन्। गिता रानाले पेनाल्टीमा गोल गर्न सकिनन् । आर्मीका अन्जना राना मगर र निशा बोहराले गोल गरिन्। तर, कृष्णा खत्री, अन्जली सुब्बा र ईन्दिरा राईले गोल गर्न नसक्दा आर्मी उपाधिबाट बन्चित भएको हो।

१९ औं मिनेटमा अनिता बस्नेतले गोल गर्दै एपीएफलाई सुरुवाती अग्रता दिलाएकी थिइन्। ६३ औं मिनेटमा बिमला चौधरीले गोल गर्दै खेल बराबरीमा ल्याएकी थिईन्।

प्रतियोगितामा आर्मीकी पुनम जर्गा मगर सर्वोकृष्ट खेलाडी घोषित भईन् । उनले एक थान स्कुटर प्राप्त गरिन्। यस्तै उत्कृष्ट फरवार्ड एपीएफकी साबित्रा भण्डारी, मिडफिल्डरमा आर्मीकी बिमला चौधरी, डिफेन्डरमा आर्मीकी सुमित्रा चौधरी, गोलकिपरमा एपीएफकी एन्जिला सुब्बा र उत्कृष्ट प्रशिक्षक एपीएफका जनक सिंह घोषित भए। उत्कृष्ट हुनेले जनही ५-५ हजार प्राप्त गरेका छन् ।