युइएफए च्याम्पियन्स लिग अन्तर्गत प्रि–क्वाटरफाइनलको पहिलो लेगमा इंग्लिस क्लब चेल्सीले सहज जित निकालेको छ। चेल्सीले घरेलु मैदानमा फ्रान्सेली प्रतिद्धन्द्धी लिललाई २–० ले हराएको हो।
स्टाम फोर्ड ब्रिजमा चेल्सीलाई जिताउन काई हाभर्टज र क्रिस्टियन पुलिसिसले गोल गरे।
खेलको आठौं मिनेटमा काई हाभर्टजले गोल गर्दै चेल्सीलाई सुरूआती अग्रता दिलाएका थिए। हाकिम जियाचको कर्नरमा अनमार्क रहेका उनले हेडमार्फत गोल गरेका हुन्।
पहिलो हाफ १-० ले अघि रहेको घरेलु टोलीले दोस्रो हाफमा थप एक गोल गर्दै जित निश्चित गर्यो।
खेलको ६३औं मिनेटमा क्रिस्टियन पुलिसिसले गोल गर्दै चेल्सीको अग्रता दोब्बर पारे। त्यसपछि थप गोल निस्कन नसक्दा चेल्सी २-० ले विजयी भयो।
यो जितसँगै चेल्सीले च्याम्पियन्स लिगको क्वाटरफाइनलमा पुग्ने सम्भावना बलियो बनाएको छ।
अब दोस्रो लेगमा यही नतिजा कायम राख्न सके चेल्सी अन्तिम आठमा प्रवेश गर्नेछ। लिललाई अघिल्लो चरण प्रवेश गर्न कम्तीमा पनि ३–० को जितको खाँचो छ। दोस्रो लेगको खल लिलको मैदानमा आगामी मार्च १७ मा हुनेछ।
