इंग्लिस प्रिमियर लिगमा लिभरपुलले सानदार जित निकालेको छ। लिभरपुलले घरेलु मैदानमा लिड्स युनाइटेडमाथि ६–० को फराकिलो जित निकालेको हो ।
लिभरपुलको जितमा सलाह र मानेले समान दुई गोल गर्दा जोएल मटिप र भर्जिल भान डाइकले समान एक गोल गरेका थिए।
एनफिल्डमा बुधबार राति भएको खेलको १५ औं मिनेटमा सलाहको पेनाल्टी गोलबाट लिभरपुल सुरूआती अग्रता दिलाएका थिए।
खेलको ३०औं मिनेटमा जोएल मटिपले गोल गर्दै लिभरपुलको अग्रता दोब्बर पारे। त्यसको ५ मिनेटपछि पुनः सलाहले पेनाल्टीमार्फत नै व्यक्तिगत दोस्रो तथा टोलीका लागि तेस्रो गोल गरेपछि लिभरपुल पहिलो हाफमा ३–० ले अघि बढ्यो ।
दोस्रो हाफको ८० औं मिनेटमा मानेले गोल गर्दै लिभरपुललाई खेलमा ४–० ले अघि बढाए। ९०औं मिनेटमा मानेले व्यक्तिगत दोस्रो तथा टोलीका लागि पाँचौ गोल गर्दै लिभरपुललाई फराकिलो जिततर्फ अग्रसर गराएका थिए।
इन्ज्युरी समयमा भर्जिल भान डाइकले गोल गर्दै लिभरपुलको फराकिलो जित पक्का गरे ।
यो जितसँगै लिभरपुलले शीर्षस्थानको म्यानचेस्टर सिटीसँगको अंक दुरी ३ मा छोट्याउँदै उपाधि जित्ने सम्भावना जीवितै राखेको छ।
दोस्रो स्थानमा रहेको लिभरपुलको २६ खेलबनट ६० अंक पुगेको छ । समान खेलबाटै सिटीको ६३ अंक छ। पराजित लिड्स २५ खेलबाट २३ अंक जोडेर १५औं स्थानमा रहेको छ। तालिकामा एक खेल कम खेलेको चेल्सी ५० अंकसहित लिभरपुललाई पछ्याइरहेको छ।
