इंग्लिस प्रिमियर लिग फुटबलमा पुनरागमन जित निकाल्दै आर्सनल पाँचौ स्थानमा उक्लिएको छ।
बिहीबार राति भएको खेलमा उल्भ्समाथि २-१ गोल अन्तरको जित निकाल्दै आर्सनल अंक तालिकाको शीर्ष पाँचमा उक्लिएको हो।
घरेलु मैदानमा सुरूआती एक गोलको अग्रता उल्टाएर आर्सनलले उत्कृष्ट जित निकालेको हो ।
खेलको दशौँ मिनेटमा ह्वाङ्ग हि चानले गोल गर्दै उल्भ्सलाई सुरूआती अग्रता दिलाए। पहिलो हाफमा १-० ले पछि परेको आर्सनलले गोल फर्काउन ८२ औं मिनेटसम्म कुर्नु परेको थियो।
निकोलस पेपेले गोल गर्दै आर्सनललाई १-१ गोलको बराबरीमा ल्याए। त्यसपछि खेलको इन्जुरी समयमा उल्भ्सका जोसे साले आत्मघाती गोल उपहार दिएपछि आर्सनल २-१ ले विजयी भयो।
यस जितसँगै आर्सनलले २४ खेलमा ४५ अंक जोडेको छ। पराजित उल्भ्स ४० अंक जोडेर सातौं स्थानमा छ।
६३ अंक जोडेको म्यान्चेष्टर सिटी शीर्ष स्थानमा रहँदा ६० अंकसहित लिभरपुल दोस्रो तथा ५० अंकसहित चेल्सी तेस्रो स्थानमा छन्। आर्सनलभन्दा अगाडि रहेको म्यान्चेष्टर युनाइटेडले ४६ अंक जोडेको छ।
