करिम बेन्जेमाको निर्णायक गोलमा शीर्षस्थानको रियल म्याड्रिडले स्पेनिस ला लिगामा कठिन जित निकालेको छ। रियलले घरेलु टोली रायो भालेकानोमाथि १–० ले जित निकाल्दै अंक तालिकामा ९ अंकको अग्रता बनाएको छ।
पहिलो हाफ गोलरहित बराबरीमा सकिएको खेलको दोस्रो हाफको अन्त्यतिर बेन्जेमाले गोल गरे। उनले खेलको ८३ औं मिनेटमा भिनिसयस जुनियरको पासमा गोल गर्दै रियललाई महत्वपूर्ण जित दिलाए।
शनिबार राति भएको खेलमा रियलले घरेलु टोलीलाई लगातार दवावमा राखे पनि गोलको लागि निकै संघर्ष गर्नुपर्यो।
यो जितसँगै रियलको २६ खेलबाट ६० अंक पुगेको छ। एक खेल कम खेलेको सेभियाको ५१ अंक छ।
पराजित रायो भालेकानो २५ खेलबाट ३१ अंक जोडेर १२औं स्थानमा छ।
आजै भएको अर्को खेलमा सेल्टा भिगोलाई २-० ले हराउँदै एथ्लेटिको म्याड्रिड चौथो स्थानमा उक्लिएको छ।
