नर्विच सिटीलाई २-१ ले हराउँदै लिभरपुल एफए कपको क्वार्टरफाइनलमा प्रवेश गरेको छ ।
लिभरपुलको जितमा ताकुमी मिनामिनोले दुई गोल गरे। नर्विच सिटीका लागि लुकास रूपले एक गोल फर्काए।
लिभरपुलको घरेलु मैदान एनफिल्डमा बुधबार राति खेलको २७ औं मिनेटमा ताकुमी मिनामिनोले गोल गर्दै लिभरपुललाई सुरूवाती अग्रता दिलाए।
३९ औं मिनेटमा मिनामिनोले व्यक्तिगत दोस्रो गोल गर्दै लिभरपुललाई पहिलो हाफमा २–० को अग्रता दिलाए।
पहिलो हाफमा २-० ले पछि परेको नर्विचले दोस्रो हाफमा निकै सुधारिएको प्रदर्शन गर्यो। खेलको ७६ औं मिनेटमा लुकास रुपले गोल गर्दै खेललाई २–१ को अवस्थामा ल्याए। तर त्यसपछि थप गोल निस्कन नसक्दा लिभरपुल अन्तिम ८ मा प्रवेश गर्यो।
यस्तै गए रातीनै भएको अर्को खेलमा चेल्सीले लुटोन टाउनलाई ३-२ ले हराउँदै अन्तिम आठमा स्थान पक्का गरेको छ।
अर्को खेलमा साउथह्याम्टनले वेस्ट ह्याम युनाइटेडलाई ३–१ ले हरायो।
