इंग्लिस क्लब म्यानचेस्टर सिटी युइएफए च्याम्पियन्स लिगको क्वार्टरफाइनलमा प्रवेश गरेको छ।
बुधबार राति घरेलु मैदानमा पोर्चुगिज क्लब स्पोर्टिङ सिपीसँग प्रि–क्वाटरफाइनलको दोस्रो लेगमा गोलरहित बराबरी खेले पनि समग्रमा ५–० को जित निकाल्दै सिटीले अन्तिम आठको यात्रा तय गरेको हो।
सिटीले पहिलो लेगमा ५–० को अवे जित निकालेको थियो।
इतिहाद स्टेडियममा गएराती सिटीले पाहुना टोलीलाई लगातार दवावमा राखे पनि गोल भने गर्न सकेन। स्पोर्टिङले सिटीको तुलनामा केही आक्रमण बुने पनि गोल गर्न नसक्दा खेल बराबरीमा टुंगियो ।
यस्तै प्रि–क्वाटरफाइनलको दोस्रो लेगमा फ्रान्सेली क्लब पेरिस सेन्ट जर्मेन (पिएसजी) माथि ३–१ को पूनरागमन जित निकाल्दै स्पेनिस क्लब रियल म्याड्रिड क्वार्टरफाइनलमा प्रवेश गरेको छ।
कप्तान करिम बेन्जेमाको ह्याट्रिक गरेपछि खेलमा पछि परेको स्थिति उल्ट्याउँदै रियलले पूनरागमन जित निकालेको हो।
