क्रिस्टियानो रोनाल्डोको ह्याट्रिकप्रेरित म्यानचेस्टर युनाइटेडले इंग्लिस प्रिमियर लिगमा रोमाञ्चक जित निकालेको छ।
घरेलु मैदानमा गए राती भएको खेलमा युनाइटेडले टोटेनहममाथि ३-२ रोमाञ्चक जित निकालेको हो।
टोटेनहमका लागि ह्यारी केनले पेनाल्टीमा गोल गर्दा अर्को गोल ह्यारी मगाएरको आत्मघाती गोल उपहार दिएका थिए।
खेलको १२ औं मिनेटमा रोनाल्डोले उत्कृष्ट गोल गर्दै युनाइटेडलाई सुरूआती अग्रता दिलाए।
३५ औं मिनेटमा युनाइटेडका एलेक्स टेलेस पेनाल्टी क्षेत्रभित्र ह्यान्ड गरेपछि टोटेनहमले पेनाल्टी पाएको थियो। केनले उक्त पेनाल्टीमा गोल गर्दै खेललाई बराबरीमा ल्याए। तर युनाइटेडले त्यसको ३ मिनेटपछि नै रोनाल्डोको व्यक्तिगत दोस्रो गोलबाट खेलमा पुनः अग्रता लियो।
दोस्रो हाफको ७२ औं मिनेटमा खेल पुनः बराबरीमा आयो। रेगुइलोनको क्रसमा मगाएरको क्लिअर गर्ने प्रयास सिधै गोल भए पछि खेल २-२ गोलको बराबरीमा आयो।
तर ८१ औं मिनेटमा रोनाल्डोले ह्याट्रिक पूरा गर्दा युनाइटेडलाई रोमाञ्चक जित निकाल्यो।
यो सँगै रोनाल्डोले १४ वर्षपछि म्यानचेस्टर युनाइटेडका लागि ह्याट्रिक पुरा गरे।
यो जितसँगै आर्सनललाई पछि पार्दै युनाइटेड चौथो स्थानमा उक्लिएको छ। युनाइटेटले २९ खेलबाट ५० अंकजोडेको छ।
पराजित टोटेनहम भने २७ खेलबाट ४५ अंकसहित सातौं स्थानमा रोकिएको छ।
शीर्ष ४ को दौडमा आर्सनल २५ खेलमा ४८ तथा वेस्ट ह्याम २८ खेलमा ४५ अंकसहित प्रतिस्पर्धामा छन्।
तेस्र स्थानमा रहेको चेल्सीको तेस्रो खेलबाट ५६ अंक जोडेको छ भने दोस्रो स्थानमा रहेको लिभरपुलको २८ खेलबाट ६६ अंक जोडेको छ। शीर्ष स्थानको म्यान्चेष्टर सिटीको ६९ अंक भएको छ।
