स्टेभन वर्गवाइनले दुई गोल गरेपछि डेनमार्कविरूद्धको अन्तर्राष्ट्रिय मैत्रीपूर्ण खेलमा नेदरल्यान्ड्सले सहज जित निकालेको छ।
घरेलु मैदानमा नेदरल्यान्ड्सले डेनमार्कलाई ४–२ ले हराएको हो।
डच टोलीको जितमा स्टेभन वर्गवानले दुई तथा नथान एके र मेम्फिस डिपाएले समान एक गोल गरे। डेनमार्कका जान्निक भेस्टेरगार्ड र क्रिस्टियन इरिक्सनले समान एक-एक गोल गरे पनि हार टार्न सकेनन्।
शनिबार राति भएको खेलमा घरेलु टोलीले खेलको १६ औं मिनेटमा स्टेभन वर्गवाइनको गोलबाट अग्रता लिएको थियो।
२०औं मिनेटमा जान्निकले गोल गर्दै डेर्नमार्कलाई बराबरीमा ल्याए। २९औं मिनेटमा नाथन एकेले गोल गर्दै पुनः नेदरल्यान्ड्सलाई खेलमा २–१ ले अघि बढाए। ३८औं मिनेटमा मेम्फिस डिपाएले पेनाल्टीमा गोल गर्दै टोलीलाई पहिलो हाफमा ३–१ ले अघि बढाए ।
दोस्रो हाफको सुरूमै ४८ औं मिनेटमा क्रिस्टियन इरिक्सनले गोल गर्दै खेललाई ३–२ को स्थितिमा ल्याए।
खेलको ७१औं मिनेटमा वर्गवाइनले व्यक्तिगत दोस्रो तथा टोलीका लागि चौथो गोल गर्दै टोलीलाई ४-२ ले अघि बढाए। त्यसपछि खेलमा गोल हुन नसक्दा नेदरल्याण्डले जित पक्का गर्यो।
