न्युक्यासल युनाइटेडमाथि उत्कृष्ट पुनरागमन जित निकाल्दै टोटनह्याम इङ्लिस प्रिमियर लिगको चौथौ स्थानमा उक्लिएको छ ।
आइतबार राति भएको खेलमा १ गोलले पछि परेको अवस्था उल्ट्याउँदै ५-१ को उत्कृष्ट पुनरागमन जितसहित टोटनह्याम शीर्ष चारमा उक्लिएको हो।
खेलको ३९ औं मिनेटमा फाबियाना साचारको फ्रिकिक गोलमा न्युक्यासलले सुरूआती अग्रता लिएको थियो। त्यसको चार मिनेटपछि नै टोटनह्याम खेलमा फर्कियो। सनको क्रसमा बेन डेभिसले गोल गर्दै पहिलो हाफमा खेललाई १-१ को बराबरीमा ल्याए।
दोस्रो हाफमा आक्रमक खेलेको टोटनह्यामले थप चार गोल गर्यो। ४८औं मिनेटमा म्याट डोहेर्टेको गोल गर्दै टोटनह्यामलाई २-१ को अग्रता दिलाए। त्यसको ६ मिनेटपछि सनले गोल गर्दै टोटहमले अग्रता ३-१ मा पुर्याए।
६३औं मिनेटमा इमर्सन रोयलले बललाई जाली चुमाएपछि टोटनह्याम फराकिलो जिततर्फ अघि बढेको थियो। खेल सकिन सात मिनेट बाँकी रहँदा स्टेभिन बर्जविनले टोटनह्यामका लागि पाँचौ गोल गर्दै सानदार जित दिलाए।
३० खेलबाट ५४ अंक बटुलेको टोटनह्याम चौथो स्थानमा उक्लिएको छ। पाँचौ स्थानको आर्सनलको पनि समान ५४ अंक भए पनिगोल अन्तरमा पछि छ। यद्यपि आर्सनलले टोटनह्यामभन्दा दुई खेल कम खेलेको छ।
प्रिमियर लिगअन्तर्गत आइतबार भएको अर्को खेलमा वेस्टह्याम युनाइटेडले एभर्टनमाथि २-१ को जित निकाल्दै छैठौं स्थानमा उक्लिएको छ।
शीर्ष स्थानमा रहेको म्यान्चेष्टर सिटीको ३० खेलबाट ७३ अंक पुगेको छ। दोस्रो स्थानमा रहेको लिभरपुल समान खेलबाट ७२ अंकसहित सिटीलाई पछ्याइरहेको छ। एक खेल कम खेलेको चेल्सी ५९ अंकसहित तेस्रो स्थानमा छ।
