घरेलु टोली बर्नलीले इंग्लिस प्रिमियर लिगमा एभर्टनमाथि रोमाञ्चक जित निकालेको छ। पहिलो हाफमा पछि परेको अवस्था उल्ट्याउँदै बर्नलीले एभर्टनमाथि ३–२ ले रोमाञ्चक जित निकालेको हो।
टर्फ मुरमा घरेलु टोलीलाई जिताउन नाथन कोलिन्स, जे रोड्रिग्वेज र म्याक्सवेल कर्नेटले गोल गरे। एभर्टनका लागि दुवै गोल रिचार्लीसनले पेनाल्टीमा गरे पनि हार टार्न सकेनन्।
खेलको १२ औं मिनेटमा नाथन कोलिन्सको गोल गर्दै घरेलु टोलीले सुरूआती अग्रता दिलाए। १८औं मिनेटमा रिचार्लीसनले पेनाल्टीमा गोल गर्दै खेललाई १–१ गोलको बराबरीमा ल्याए। ४१औं मिनेटमा रिचार्लीसनको पुन पेनाल्टीबाट दोस्रो गोल गर्दै एभर्टनले पहिलो हाफमा २–१ को अग्रता लियो।
तर, त्यो अग्रतालाई एभर्टनले दोस्रो हाफमा जोगाउन सकेन। ५७ औं मिनेटमा जे रोड्रिग्वेजले गोल गर्दै खेललाई २–२ गोलको बराबरीमा ल्याए। त्यसपछि ८५औं मिनेटमा म्याक्सवेल कर्नेटले गोल गर्दै बर्नलीलाई रोमाञ्चक जित दिलाए।
यो जितसँगै बर्नली २९ खेलबाट २४ अंक जोडेर रेलिगेसन जोनको १८औं स्थानमा रहेको छ। पराजित एभर्टन २५ अंक जोडेर १७औं स्थानमा कायमै छ।
लिगको शीर्ष स्थानमा रहेको म्यान्चेष्टर सिटीले ३० खेलबाट ७३ अंक जोडेको छ। दोस्रो स्थानमा रहेको लिभरपुलले ७२ अंकसहित पछ्याइरहेको छ। तेस्रो स्थानको चेल्सीले ५९ अंक जोडेको छ।
