डिफेन्डिङ च्याम्पियन बायर्न म्युनिखलाई पन्छाउँदै भिल्लारियल च्याम्पियन्स लिगको सेमिफाइनलमा पुगेको छ।
च्याम्पियन्स लिगको दोस्रो लेगमा स्पेनिस टोली भिल्लारियले बुधबार बिहान बायर्न म्युनिखलाई उसैको मैदानमा १–१ गोलको बराबरीमा रोक्दै समग्रमा २-१ को नतिजासहित अन्तिम चारमा पुगेको हो।
पहिलो लेगमा भिल्लारियलले बायर्नलाई १–० ले हराएको थियो।
आजको दोस्रो लेगको पहिलो हाफ गोलरहित बराबरीमा सकिएको थियो।
दोस्रो हाफको ५१ औं मिनेटमा रोबेर्ट लेवान्डोवेस्कीले गोल गर्दै बायर्नलाई अग्रता दिलाए। यो गोलसँगै खेलमा फर्किएको बायर्न अन्तिम २ मिनेट रोक्न नसक्दा हार व्यहोर्न बाध्य भयो।
चुक्वेजेले खेल सकिन २ मिनेट बाँकी रहँदा भिल्लारियलका लागि गोल गर्दै अन्तिम चारको यात्रा निश्चित गरेका थिए।
यो सँगै बुधबार १-१ गोलको बराबरी खेलेको भिल्लारियल समग्रमा २-१ को नतिजासहित अन्तिम चारमा प्रवेश गरेको हो।
यसअघि आजै भएको खेलमा चेल्सीलाई पन्छाउँदै रियल म्याड्रिड अन्तिम चारमा पुग्यो।
