म्यानचेस्टर सिटी च्याम्पियन्स लिग फुटबलको सेमिफाइनलमा प्रवेश गरेको छ।
बुधबार राति भएको क्वार्टरफाइनलको दोस्रो लेगमा एट्लेटीको मड्रिडसँग गोलरहित बराबरी खेलेर समग्रमा १-० को जित निकाल्दै सिटी अन्तिम चारमा पुगेको हो ।
घरेलु मैदानमा भएको पहिलो लेगमा निकालेको १-० को जित नै सिटीलाई सेमिफाइनल पुग्न पर्याप्त रह्यो।
एट्लेटीकोको मैदानमा भएको दोस्रो लेगमा बुधबार राती दुबै टोलीले गोल गर्न सकेनन्। दुबै टोलीले पाएका केही राम्रा अवसर खेर फाल्दा सिटीलाई सहज बन्यो।
घरेलु टोली एट्लेटिको अन्तिम समयतिर १० खेलाडीमा समेटिएको थियो।
खेलको इन्ज्युरी समयमा फिलिपेले दोहोरो पहेलो कार्ड पाउँदै मैदान बाहिरिएका थिए। यद्यपि सिटीले यसको फाइदा उठाउन सकेन।
अब सिटीले सेमिफाइनलमा रियल मड्रिडको सामना गर्नेछ।
