इटाली र जर्मनीले युइएफए नेसन्स लिगमा बराबरी खेलेका छन्।
लिग अन्तर्गत समूह ए ३ को पहिलो खेलमा १-१ गोलको बराबरी खेल्दै इटाली र जर्मनीले अंक बाँडेका हुन्।
इटालीको बोलोग्नामा शनिबार राति भएको खेलमा घरेलु टोलीका लागि लोरेन्जो पेलिग्रेनीले गोल गर्दा जर्मनीका योसुवा किम्मिखले बराबरी गोल फर्काए। अत्यन्त प्रतिस्पर्धात्मक खेलमा पहिलो हाफ गोलरहित बराबरीमा सकिएको थियो।
खेलको ७०औं मिनेटमा लोरेन्जो पेलिग्रेनीले गोल गर्दै घरेलु टोलीलाई सुरूआती अग्रता दिलाए। तर, इटालीको त्यो अग्रता तीन मिनेट पनि टिकेन। ७३औं मिनेटमा योसुवा किम्मिखले गोल गर्दै खेललाई पुनः बराबरीमा ल्याए। त्यसपछि थप गोल निस्कन नसक्दा खेल बराबरीमा टुंगियो ।
यो बराबरीपछि यी दुवै टोलीमा समूहमा एक अंक जोडेका छन्। जर्मनी दोस्रो तथा इटाली तेस्रो स्थानमा रहेका छन्।
इंग्ल्यान्डमाथि ६० वर्षमा पहिलो जित निकालेको हंगेरी शीर्ष स्थानमा छ। इङ्ल्याण्ड पुछारमा छ।
1654394899.jpeg)
