प्रि-सिजन टुरका लागि मलेसियामा रहेको ए डिभिजन क्लब न्युरोड टिम (एनआरटी) आफ्नो पहिलो खेलमा पराजित भएको छ।
मलेसियाको पेनाङमा जारी टिवाइटी कपको पहिलो खेलमा एनआरटीलाई इन्डोनेसियाको कारो एफसीले ५-१ गोलले पराजित गर्यो।
कारो इन्डोनेसियाको दोस्रो डिभिजनको लिग-२ खेल्ने क्लब हो।
अब एनआरटीले आफ्नो दोस्रो खेलमा पर्सी शनिबार पेनाङसँग खेल्नेछ। पेनाङ मलेसियाको सुपर लिग क्लब हो।
लिगको अंकको आधारमा विजेता र उपविजेता टोलिको टुंगो लाग्नेछ।
प्रतियोगिता पेनाङका शहर प्रमुख मिस्टर याङले पदबहाली ग्रहण गरेको पहिलो बार्षिकोत्सवको अवसरमा आयोजना भएको हो।
प्रतियोगिताको विजेताले १० हजार मलेसियन रिङ्गेट पुरस्कार जित्नेछ। उपविजेता टोलीले ५ हजार मलेसियन रिङ्गेट पुरस्कार जित्नेछ।
एनआरटीले थाइल्याण्डमा ३ मैत्रीपूर्ण खेल खेल्ने तालिका रहेको छ। जसमध्ये एक खेल थाई लिग वान क्लव चोनबुरी एफसीसँग खेल्ने छ। एनआरटीको टोली मलेसियाबाटै थाइल्याण्ड जाने तालिका रहेको छ।
