आर्सनलले इंग्लिस प्रिमियर लिगमा विजयी सुरूआत गरेको छ। शुक्रबार राति भएको सिजनको पहिलो खेलमा लन्डन क्लब आर्सनलले क्रिस्टल प्यालेसलाई २-० ले हराउँदै सुखद सुरूआत गर्यो।
प्यालेसको मैदान सेलहर्स्ट पार्कमा आर्सनललाई जिताउन ग्याब्रिएल मार्टिनेलीले गोल गरे। थप गोल विपक्षी कप्तान मार्क गुएहिको आत्मघाती उपहार दिए।
खेलको २० औं मिनेटमा मार्टिनेलीले गोल गर्दै आर्सनललाई सुरूआती अग्रता दिलाए।
पहिलो हाफमा १-० ले अघि बढेको आर्सनलले दोस्रो हाफमा अग्रता दोब्बर पार्यो।
खेल सकिन ५ मिनेट बाँकी हुँदा बुकायो साकाको क्रस गुएहिले आफ्नै पोस्टतर्फ हानेपछि पाहुना टोली २-० ले अघि बढ्यो।
त्यसपछि खेलमा थप गोल भएन र खेल आर्सनलले जित्यो।
यो जितसँगै आर्सनलले पहिलो खेलमै ३ अंक जोडेको छ। गत सिजन सुरूवातकै तीन खेल गुमाएको आर्सनलले यसपटक भने पहिलो खेलमै जित हासिल गर्यो।
