लन्डन क्लब चेल्सीले इंग्लिस प्रिमियर लिगको सिजन २०२२-२३ मा विजयी सुरूआत गरेको छ। आफ्नो पहिलो खेलमा गएराति चेल्सीले एभर्टनको मैदानमा १-० को जित निकाल्दै लिगमा विजयी सुरूआत गरेको हो।
चेल्सीको जितमा जर्जिन्होले गरेको पेनाल्टी गोल नै निर्णायक बन्यो। उनले पहिलो हाफको इन्ज्युरीमा गोल गरेका थिए।
त्यसअघि लन्डनकै अर्को टोली टोटेनहम हट्सपरले पनि नयाँ सिजनमा उत्कृष्ट सुरूआत गर्ने क्रममा घरेलु मैदानमा साउथह्याम्पटनमाथि ४-१ ले नतिजा निकाल्यो।
टोटेनहमको जितमा रायन सेस्सेनन्, एरिक डाएर र डेजान कुलुसेभ्सकीले गोल गर्दा एक गोल आत्मघाती गोल भएको थियो। साउथह्याम्पटनका लागि कप्तान जेम्स वार्ड प्राउजले गोल गरेका थिए।
शनिबार नै भएको खेलमा न्युकासल युनाइटेडले यसै सिजन बढुवा भएको नटिङहम फरेस्टलाई २-० ले हरायो। न्युकासलको जितमा फाबियन सेर र क्यालम विल्सनले गोल गरे ।
अर्को नवप्रवेशी बर्नमाउथले भने घरेलु मैदानमा एस्टन भिल्लालाई हरायो।
लिड्स युनाइटेडले वल्भ्समाथि पुनरागमन जित दर्ता गर्यो।
त्यसअघि दिनको पहिलो खेलमा उपाधिको दावेदार मानिएको लिभरपुल इंग्लिस प्रिमियर लिगको पहिलो खेलमा नवप्रवेशी फुल्हमसँग बराबरीमा रोकिएको थियो।
यसअघि शुक्रबार भएको लिगको पहिलो खेलमा आर्सनलले क्रिस्टल प्यालेसलाई २-० ले हराएको थियो।
