इंग्लिस प्रिमियर लिग फुटबलमा आर्सनलले लगातार तेस्रो जित निकालेको छ ।
शनिबार राति भएको खेलमा बर्नेमाउथलाई ३-० गोल अन्तरले हराउँदै आर्सनलले अपराजित यात्रा कायमै राखेको हो।
आर्सनललाई जिताउन कप्तान मार्टिन ओडेगार्डले दुई गोल गर्दै थप गोल विलियम सालिबाले गरे।
खेलको पाँचौं मिनेटमा ओडेगार्डले गोल गर्दै आर्सनललाई सुरूआती अग्रता दिलाए। खेलको ११ औं मिनेटमा ओडेगार्डले व्यक्तिगत दोस्रो गोल गर्दै टोलीको अग्रता दोब्बर पारे।
पहिलो हाफमा २-० ले अघि रहेको आर्सनलले दोस्रो हाफमा थप एक गोल गर्यो। खेलको ५४ औं मिनेटमा सालिबाले गोल गर्दै आर्सनललाई ३-० को सहज जित दिलाए ।
यस जितसँगै तीन खेलबाट ९ अंक जोडेको आर्सनल शीर्ष स्थानमा उक्लिएको छ ।
बर्नेमाउथ ३ अंक जोडेर १४ औं स्थानमा रहेको छ।
