नेपाली राष्ट्रिय क्रिकेट टिमका कप्तान सन्दीप लामिछाने सिजन २०२२-२३ को बिग ब्यास लिग (बिबिएल) लागि भएको 'ड्राफ्ट' बाट टिममा छनोट हुन असफल भएका छन्।
अस्ट्रेलियाको फ्रेञ्चाइज क्रिकेट लिग बिबिएलको 'ड्राफ्ट'मा नेपालबाट सन्दीप र सुवास खकुरेलसहित १६९ विदेशी खेलाडी समावेश थिए।
बिबिएलका टिमले आज 'ड्राफ्ट'मार्फत तीन-तीन विदेशी खेलाडी आफ्नो टिममा भित्र्याउदा नेपालका सन्दीप र सुवासलाई कुनै पनि टिमले चासो दिएनन्।
बिबिएल टिमले यसपटकदेखि 'ड्राफ्ट'मार्फत विदेशी खेलाडी भित्र्याएका हुन्।
सन्दीप यसपटक पनि होबार्ट हरिकेन्सले 'रिटेन' गर्न योग्य खेलाडी थिए।
सन्दीपले यसअघि लगातार दुई सिजन हरिकेन्सबाट खेलिसकेका छन्। हरिकेन्सबाट खेल्नुअघिको दुई सिजन सन्दीपले मेलवर्न स्टार्सबाट खेलेका थिए।
सन्दीपले बिबिएलमा लगातार चार सिजनमा ४३ खेल खेलिसकेका छन्। जसमा उनले ४८ विकेट विकेट लिएका छन्।
बिबिएलमा उनको उत्कृष्ट प्रदर्शन ३ विकेट लिएर २६ रन दिनु हो।
