इङ्लिस प्रिमियर लिगमा सुरूआती अग्रता जोगाउन नसक्दा चेल्सी पराजित भएको छ।
मंगलबार राति सम्पन्न खेलमा चेल्सी घरेलु टोली साउथह्याम्प्टनसँग २-१ गोल अन्तरले पराजित भएको हो।
साउथह्याम्प्टनको जितमा रोमियो लाभिया र एडम आर्मस्ट्रङले १-१ गोल गरे। चेल्सीका लागि रहिम स्टर्लिङले १ गोल गरेका थिए।
खेलको २३ औं मिनेटमा स्टर्लिङले गोल गर्दै चेल्सीलाई सुरूआती अग्रता दिलाए। तर त्यसको ५ मिनेटपछि लाभियाले गोल गर्दै खेल बराबरीमा ल्याए।
त्यसपछि पहिलो हाफको अतिरिक्त समयमा एडमले गोल गर्दै साउथह्याम्प्टनलाई २-१ को अग्रता दिलाए।
दोस्रो हाफमा चेल्सीले केही राम्रा मौका खेर फालेको थियो। यो सँगै दुबै टोलीले गोल गर्न नसक्दा घरेलु टोली साउथह्याम्प्टन २-१ ले विजयी भयो।
यो जितसँगै साउथह्याम्प्टन ५ खेलबाट ७ अंक जोडेर सातौ स्थानमा छ। समान खेलबाट दोस्रो स्थानमा उक्लने मौका गुमाएको चेल्सी ७ अंकसहित आठौं स्थानमा झरेको छ।
लिगको शीर्ष स्थानमा आर्सनल छ।
मंगलबार नै सम्पन्न अन्य खेलमा फुलह्यामले ब्राइटनलाई २-१ ले पराजित गरेको छ। यस्तै, क्रिस्टल प्यालेस र ब्रेन्टफोर्ड तथा लिड युनाइटेड र एभर्टनले १-१ गोलको बराबरी खेलेका छन्।
