इंग्लिस प्रिमियर लिगमा आर्सनलको विजयी यात्रालाई रोक्दै म्यानचेस्टर युनाइटेडले लगातार चौथो जित निकालेको छ।
युनाइटेडको घरेलु मैदान ओल्ड ट्राफर्डमा आइतबार सम्पन्न खेलमा युनाईटेडले आर्सनललाई ३–१ गोल अन्तरमा हरायो। युनाइटेडको जितमा मार्कुस रासफोर्डले २ तथा एन्टोनी सान्तोषले एक गोल गरे।
एन्टोनीले खेलको ३५ औं मिनेटमा युनाइटेडलाई सुरूआती अग्रता दिलाए।
दोस्रो हाफको ६० औं मिनेटमा आर्सनलले बराबरी गोल फर्कायो। युनाइटेडको डिफेन्समा कमजोरीको फाइदा उठाउँदै बुकायो साकाले गोल गरेका थिए। तर त्यसको ६ मिनेटपछि नै युनाइटेडले पुन: अग्रता लियो। रासफर्डले गोल गर्दै खेलमा घरेलु टोलीलाई २-१ ले अघि बढाए।
खेलको ७५ औं मिनेटमा रासफर्डले व्यक्तिगत दोस्रो गोल गर्दै युनाइटेडको अग्रता दोब्बर पारे। त्यसपछि खेलमा गोल भएन र खेल युनाइडेटले ३-१ ले जित्यो।
यो जितसँगै युनाइटेडको ६ खेलमा १२ अंक भएको छ। सुरूआती दुई खेल हारेको युनाइटेडले त्यसयता सबै खेलमा जित हासिल गरेको छ। आर्सनल भने पहिलो हारका बाबजुद अंक तालिकाको शीर्ष स्थानमा कामयै छ।
आर्सनलले ६ खेलमा १५ अंक जोडेको छ। समान खेलबाट अपराजित रहेका म्यान्चेष्टर सिटी र टोटनह्याम समान १४ अंकसहित दोस्रो र तेस्रो स्थानमा छन्। एक खेल हारेको ब्राइटन १३ अंकसहित चौथो स्थानमा छ।
