डेनमार्कलाई हराउँदै क्रोएसिया युइएफए नेसन्स लिग ए समूह १ मा शीर्षस्थानमा उक्लिएको छ।
घरेलु मैदानमा डेनमार्कमाथि २–१ को रोमाञ्चक जित निकाल्दै क्रोएसिया शीर्षस्थानमा उक्लिएको हो।
क्रोएसियाको जितमा बोरना सोसा र लोभरको माजेरले १-१ गोल गरे। डेनमार्कका क्रिस्टियन एरिक्सनले एक गोल फर्काए पनि हार टार्न सकेनन्।
माकसिमिर रंगशाला जाग्रिवमा बिहीबार राति भएको खेलको पहिलो हाफ गोलरहित बराबरीमा सकिएको थियो। दोस्रो हाफको सुरूमै क्रोएसियाले अग्रता लियो। उसका लागि बोरना सोसाले ४९औं मिनेटमा गोल गरे।
यस्तै ७७ औं मिनेटमा क्रिस्टियन एरिक्सनले गोल गर्दै खेललाई १–१ गोलको बराबरीमा ल्याए। अत्यन्तै प्रतिश्पर्धात्मक खेलको ७९ औं मिनेटमा माजेरले गोल गर्दै क्रोएसियालाई पुनः २–१ को अग्रता दिलाए। त्यसपछि थप गोल निस्कन नसक्दा क्रोएसिया विजयी भयो।
यो जितसँगै क्रोएसिया ५ खेलबाट १० अंक जोडेर शीर्षस्थानमा उक्लिएको छ। पराजित डेनमार्क ९ अंक जोड्दै दोस्रो स्थानमा झरेको छ।
यहीँ समूहको अर्को खेलमा फ्रान्सले अष्ट्रियालाई २–० ले हराउँदै ५ खेलमा पहिलो जित निकालेको छ।
