युइएफए नेसन्स लिगमा नेदरल्यान्ड्सको अपराजित यात्रा ५औं खेलसम्म कायमै रहेको छ।
गएराति पोल्याण्डलाई उसकै मैदानमा २-० ले हराउँदै नेदरल्यान्ड्सले ५ खेलबाट चौथो जितसहित अपराजित यात्रा कायमै राखेको हो।
नेदरल्यान्ड्सको जितमा कोडे गाक्पो र स्टेभन वर्गवाइनले एक-एक गोल गरे।
वार्सजावामा बिहीबार राति भएको खेलको १३ औं मिनेटमा कोडे गाक्पोको गोल गर्दै नेदरल्यान्ड्सलाई सुरूवाती अग्रता दिलाए।
यस्तै ६०औं मिनेटमा स्टेभन वर्ग वाइनले भिन्सेन्ट जान्सेनको पासमा गोल गर्दै नेदरल्यान्ड्सको अग्रता दोब्बर पारे। त्यसपछि थप गोल निस्कन नसक्दा नेदरल्यान्ड्स विजयी हुन सफल भयो ।
यो जितसँगै अपराजित नेदरल्यान्ड्स लिग ए ग्रुप ४ मा ५ खेलबाट १३ अंक जोडेर शीर्षस्थानमा कायमै छ। पराजित पोल्यान्ड ४ अंक जोडेर तेस्रो स्थानमा छ ।
यहीँ समूहको अर्को खेलमा बेल्जियमले वेल्सलाई २–१ ले हरायो।
यस जितसँगै बेल्जियम ५ खेलबाट १० अंक जोडेर दोस्रो स्थानमा रहेको छ। पराजित वेल्स १ अंक जोडेर पुछारमा छ।
