एन्टोनी ग्रिजम्यानले एट्लेटिको म्याड्रिडका लागि आफ्नो १०० औं गोल गरेका छन्।
गएराति भएको खेलमा घरेलु टोली एथ्लेटिको बिल्बाओलाई ग्रिजम्यानकै निर्णायक गोलमा हराउँदै म्याड्रिड अंक तालिकाको तेस्रो स्थानमा उक्लिएको छ।
फ्रान्सेली स्ट्राइकर ग्रिजम्यानले दोस्रो हाफको दोस्रो मिनेटमा मोराटाको पासमा गोल गरेका हुन्।
पहिलो हाफ गोल रहित बराबरीमा सकिएको थियो। दुबै टोलीले गोल गर्ने केही राम्रा मौका गुमाएका थिए।
यो जितसँगै एट्लेटिको ९ खेलबाट १९ अंक जोड्दै बिल्बाओलाई पछि पारेर तेस्रो स्थानमा उक्लिएको हो।
८ खेल खेलेको बार्सिलोना शीर्ष स्थानमा रहँदा समान अंक भएको रियल म्याड्रिड दोस्रो स्थानमा छ।
पराजित एथ्लेटिको बिल्बाओ ९ खेलबाट १७ अंकसहित चौथो स्थानमा झरेको छ।
