इंग्लिस प्रिमियर लिगको अंक तालिकमा आर्सनलले सात अंकको अग्रता बनाएको छ। गएराति भएको खेलमा वेस्टह्यामलाई ३-१ गोलको पुनरागमन जित निकाल्दै आर्सनलले फराकिलो अग्रता बनाएको हो।
घरेलु मैदान इमिरेट्समा आर्सनललाई जिताउन बुकायो साका, गाब्रिएल मार्टिनेली र एडी निकाटियाले गोल गरे। पाहुना टोलीका लागि साइद बेनराहमाले गोल गरे।
खेलको २७ औँ मिनेटमा साइद बेनराहमाले पेनाल्टीमार्फत गोल गर्दै पाहुना टोली वेस्टह्यामलाई सुरूआती अग्रता दिलाए।
पहिलो हाफमा १-० गोलले पछि परेपछि घरेलु टोली दोस्रो हाफमा खेलमा फर्कियो। खेलको ५३ औं मिनेटमा साकाको गोलमार्फत आर्सनलले खेललाई बरारीमा ल्यायो।
त्यसको पाँच मिनेटपछि मार्टिनेलीले गोल गर्दै वेस्टह्यामविरूद्धको खेलमा २-१ को अग्रता बनाए।
६९ औँ मिनेटमा एडी निकाटियाको गोल गरेपछि खेलमा ३-१ को अग्रता बनायो। त्यसपछि गोल हुन नसक्दा कतार विश्वकप पछिको आफ्नो पहिलो खेलमा आर्सनलले सानदार जित निकाल्यो ।
शीर्ष स्थानमा रहेको आर्सनलको १५ खेलबाट ४० अंक छ। पराजित वेष्टह्यामले १६ खेलबाट १४ अंक जोड्दै रेलिगेशन जोन नजिक छ। तालिकाको दोस्रो स्थानमा रहेको न्युक्यासलको १६ खेलबाट ३३ अंक छ।
तेस्रो स्थानमा रहेको म्यान्चेष्ट सिटीको १४ खेलबाट ३२ अंक छ।
