इङ्लिस प्रिमियर लिगमा मंगलबार राति चेल्सीले बर्नमाउथमाथि २–० को सहज जित निकालेको छ।
चेल्सीको घरेलु मैदान चेल्सीले स्टामफोर्ड ब्रिजमा भएको खेलको १६ औं मिनेटमा काइ हाभर्ट्जले गोल गर्दै चेल्सीलाई सुरूआती अग्रता दिलाए।
रहिम स्टर्लिङले दिएको क्रसलाई हाभर्ट्जले गोल गरेका थिए। त्यसको आठ मिनेट नबित्दै म्यासन माउन्टले गरेको गोलसँगै चेल्सीले अग्रता दोब्बर पार्यो।
यहीँ अग्रता जोगाउँदै चेल्सीले विश्वकपपछिको पहिलो खेलमै जित हात पार्दै प्रिमियर लिगको सिजन पुनः सुरू गर्यो।
विश्वकपको लागि ब्रेकअघि लगातार तीन खेलमा गोल गर्न नसकेको चेल्सीलाई यो नतिजापछि शीर्ष चारको आशा बढाएको छ।
१५ खेलबाट २४ अंक जोडेको चेल्सी तालिकाको आठौं स्थानमा उक्लिएको छ। चेल्सी चौथो स्थानमा रहेको टोटनह्यामभन्दा ६ अंकले पछि छ। पराजित बोर्नेमाउथ १६ अंकसहित १४ औं स्थानमा छ।
