टोटेनहमले क्रिस्टल प्यालेसमाथि ४–० को प्रभावशाली जित हात पारेको छ।
इंग्लिस प्रिमियर लिग अन्तर्गत गएराति क्रिस्टलको घरेलु मैदान सेलहार्ट पार्कमा टोटेनहमले सबै गोल दोस्रो हाफमा गरेको थियो।
टोटेनहमको जितमा ह्यारी केनले २ तथा माट डोहार्डी र सन ह्युगले १-१ गोल गरे।
पहिलो हाफसम्म गोरहित बराबरीमा रहेको खेलको दोस्रो हाफमा टोटेनहमले प्रभावशाली प्रदर्शन गरेको हो।
खेलको ४८ औँ मिनेटमा इभान पेरिसिचको पासमा ह्यारी केनले गोल गर्दै सुरुवाती अग्रता दिलाएका थिए। त्यसको ५ मिनेटपछि बार्यन ग्रिलको पासमा केनले नै दोस्रो गोल गर्दै अग्रता दोब्बर पारे।
६८ औँ मिनेटमा माट डोहार्डीले गोल गर्दा पाहुना टोलीले ३ - ० को अग्रता बनायो। ७२ औँ मिनेटमा सन ह्युगले गोल गर्दै टोटेनहमले फराकिलो जित हात पारेको हो। पछिल्ला ५ खेलमा टोटेनहमको यो दोस्रो जित हो।
यो जितसँगै १८ खेलमा ३३ अंक बनाएको टोटेनहम पाँचौ स्थानमा यथावत छ। उसले दोस्रो स्थानको म्यानचेस्टर सिटीसँगको अंक दूरी २ मा झारेको छ भने तेस्रो स्थानको न्युक्यासल र चौथो स्थानको म्यानचेस्टर युनाइटेडसँगको दूरी १ मा कायम राखेको छ।
क्रिस्टल भने २२ अंकसहित १२ औँ स्थानमा छ। शीर्ष स्थानको आर्सनलको ४४ अंक छ।
1672883359.jpg)
