इंग्लिस प्रिमियर लिगमा लिग लिडर आर्सनलले ८ अंकको अग्रता बनाएको छ। गएराति भएको खेलमा टोटेनहममाथि २ - ० गोल अन्तरको सहज जित निकाल्दै आर्सनलले तालिकामा स्पष्ट ८ अंकको अग्रता बनाएको हो।
लन्डन डर्बीअन्तगर्त टोटेनहमको घरेलु मैदानमा भएको खेलमा आर्सनललाई जिताउन मार्टिन ओडेगार्डले गोल गर्दा थप गोल उपहार पायो।
खेलको १४ औं मिनेटमा पाहुना टोली आर्सनलले उपहार गोलबाट सुरूआती अग्रता लिएको थियो। बुकायो साकाको क्रसलाई क्लियर गर्न खोज्दा गोलरक्षक हुगो लोरिसले आफ्नै पोस्टमा गोल गर्न पुगेका थिए।
यस्तै खेलको ३६ औं मिनेटमा मार्टिन ओडेगार्डले गोल गर्दै आर्सनललाई पहिलो हाफमै अग्रता दोब्बर पारे।
दोस्रो हाफमा केही सुधारिएको प्रदर्शन गरेको घरेलु टोली टोटेनहमले गोल गर्न नसक्दा पराजित हुन पुग्यो।
यो जितपछि आर्सलको १८ खेलबाट ४७ अंक भएको छ। दोस्रो स्थानको म्यानचेस्टर सिटीको समान खेलमा ३९ अंक छ। सिटीले म्यानचेस्टर डर्बीमा युनाइटेडसँग २ - १ गोलको पराजय व्यहोरेपछि आर्सनललाई फाइदा पुगेको हो।
यस्तै गएराति नै भएको अर्को खेलमा न्युक्यासलले फुलह्याममाथि १ - ० गोलको जित निकाल्दै तेस्रो स्थानमा उक्लिएको छ।न्युक्यासलको १९ खेलबाट ३८ अंक भएको छ।
यस्तै चेल्सीले पनि क्रिस्टल प्यालेसमाथि १ - ० गोलको जित निकाल्दै १० औं स्थानमा उक्लिएको छ।
