रेलीगेशन जोनमा रहेको एभर्टनले शीर्षस्थानको आर्सनललाई स्तब्ध पारेको छ।
इङ्लिस प्रिमियर लिग अन्तर्गत गएराति एभर्टनको घरेलु मैदान गुडिसन पार्कमा आर्सनल १–० ले स्तब्ध बनेको हो।
सन डाइसको प्रशिक्षणको पहिलो खेलमा नै एभर्टनले जिताउन जेम्स तार्कोवस्कीले निर्णायक गोल गरे।
यस सिजनको लिगमा आर्सनलको यो दोस्रो हार हो। यसअघि आर्सनलले गत सेप्टेम्वर २०२२ मा म्यानचेस्टर युनाइटेडसँग ३–१ को हार बेहोरेको थियो ।
पछिल्लो ११ खेलमा एउटै जित निकाल्न नसकेको एभर्टनलाई नयाँ व्यवस्थापकको रूपमा आएपछि सन डाइसले पहिलो खेलमै विजय दिलाए।
पहिलो हाफ गोलरहित बराबरीमा सकिएको खेलको ६०औं मिनेटमा जेम्स तार्कोवस्कीले गोल गर्दै एभर्टनलाई अग्रता दिलाए।
आर्सनलले घरेलु टोलीविरुद्ध बल पोसेसन राख्दै लगातार दवाव सिर्जना गरे पनि बलियो रक्षापङ्ति तोड्न नसक्दा एभर्टनले अग्रता जोगाउँदै महत्वपूर्ण जित हात पार्यो।
एभर्टनले २२ अक्टोवर २०२२ मा क्रिस्टल प्यालेसलाई ३–० ले हराएयता ११औं खेलमा जित निकालेको हो। यस बीचमा एभर्टनले २ बराबरी र ८ हारको नतिजा निकालेको थियो ।
२१ जनवरी २०२२ मा वेस्ट ह्याम युनाइेडसँग २–० ले पराजित भएपछि एभर्टनले फ्रान्क लाम्पार्डलाई बर्खास्त गर्दै सन डाइसलाई टोलीको मुख्य प्रशिक्षकमा नियुक्त गरेको थियो। उनले आफ्नो प्रशिक्षणपछिको पहिलो खेलमा नै टोलीलाई जित दिलाए।
यस जितसँगै एभर्टन २१ खेलबाट १८ अंक जोडेर १७ औं स्थानमा उक्लिएको छ। पराजित आर्सनलले शीर्षस्थानमा आफ्नो अग्रता बढाउने अवसर गुमाएको छ। आर्सनलको २० खेलबाट ५० अंक छ ।
आर्सनलले यो सिजन २० खेलमा १६ जित र समान २ बराबरी र हारको नतिजासहित शीर्ष स्थानमा ५ अंकको अग्रता बनाएको छ।
