एस्टन भिल्लामाथि सहज जित निकाल्दै म्यानचेस्टर सिटीले इंग्लिस प्रिमियर लिगमा शीर्षस्थानको आर्सनलसँग अंक दुरी छोट्याएको छ।
गएराति भएको खेलमा सिटीले घरेलु मैदान इतिहाद स्टेडियम म्यानचेस्टरमा एस्टन भिल्लालाई ३–१ ले पराजित गरेको हो। यो नतिजासँगै उसले आर्सनलसँगको अंक दुरी ३ मा छोट्याएको छ।
सिटीको सहज जितमा रोड्री, इल्केए गुन्डोगान र रियाद महारेजले गोल गरे। भिल्लाका ओली वाटकिन्सले एक गोल फर्काएका थिए।
खेलको चौथो मिनेटमा नै रोड्रीले गोल गर्दै सिटीलाई खेलमा अग्रता दिलाएका थिए। ३९औं मिनेटमा गुन्डोगानले एर्लिङ ब्राउट हालान्डको पासमा गोल गर्दै सिटीको अग्रता दोब्बर पारे। इन्ज्युरी समयमा रियाद महारेजले पेनाल्टीमा गोल गर्दै सिटीलाई पहिलो हाफमा ३–० को अग्रता दिलाए।
दोस्रो हाफमा लयमा फर्किएको एस्टन भिल्लाका लागि ६१औं मिनेटमा ओली वाटकिन्सले गोल गर्दै खेलमा फर्कने संकेत गरे पनि त्यसपछि थप गोल निस्कन नसक्दा सिटी विजयी भयो।
यो जितसँगै दोस्रो स्थानमा रहेको सिटीको २२ खेलबाट ४८ अंक पुगेको छ। एक खेल कम खेलेको शीर्षस्थानको आर्सनलको ५१ अंक छ। पराजित भिल्ला २८ अंक जोडेर ११औं स्थानमा छ।
