मनाङ मर्स्याङ्दी क्लबले गोलकिपर दीप कार्कीलाई कप्तान नियुक्त गरेको छ।
सिजनको सहिद स्मारक ए डिभिजन लिगअघि मनाङले कार्कीलाई कप्तान नियुक्त गरेको क्लबका अध्यक्ष विजय घलेले जनाएका छन्।
अध्यक्ष घलेले कार्कीको कप्तानीमा क्लबले यो सिजन उत्कृष्ट नतिजा निकाल्ने विश्वास गरेका छन्।
अघिल्लो सिजनको मनाङको कप्तानी राष्ट्रिय टिमका फरवार्ड अन्जन विष्टले गरेका थिए। अन्जनले यसै सिजनदेखि मनाङ छाडिसकेका छन्।
मनाङले यो सिजनका लागि यसअघि स्पेनिस क्लब बार्सिलोनाको ‘बी’ टिमबाट खेलेका खेलाडी भित्र्याएको थियो।
मनाङले लिगका लागि सेनेगलका डियावान्डोउ डियाग्नेलाई भित्र्याएको हो। २८ वर्षीय डियावान्डोउसँग युरोपका विभिन्न क्लबबाट खेलेको अनुभव छ।
सिजनको ए डिभिजन लिग फागुन १९ देखि सुरु हुँदैछ।
