इंग्लिस क्लब चेल्सीले लगातार ६ खेलको पराजय यात्रामा पूर्णविराम लगाएको छ।
प्रिमियर लिगको खेलमा गएराति घरेलु मैदान स्टामफोर्ड ब्रिजमा लिड्स युनाइटेडमाथि १–० को जित निकाल्दै चेल्सीले पराजियको यात्रा रोकेको हो। चेल्सीको जितमा वेस्ले फोफानाले निर्णायक गोल गरे। उनले दोस्रो हाफको ५३औँ मिनेटमा गरेको गोल नै निर्णायक बन्यो।
जनवरी १५ मा क्रिस्टल प्यालेसलाई १–० ले हराएयता चेल्सी विजयी हुन सकेको थिएन। जितसँगै चेल्सी २५ खेलबाट ३४ अंकसहित तालिकाको १०औँ स्थानमा उक्लिएको छ।
लिड्स समान खेलबाट २२ अंक जोडेर १७ औँ स्थानमा छ। आर्सनल ६३ अंकसहित तालिकाको शीर्षस्थानमा रहँदा ५८ अंक जोडेको म्यान्चेष्टर सिटी दोस्रो स्थानमा छ।
