सहिद स्मारक ए डिभिजन लिगमा चर्च ब्वाइज युनाइटेडले लगातार दोस्रो खेलमा जित हात पारेको छ।
ए डिभिजनको नवप्रवेशी क्लब चर्च ब्वाइजले मंगलबार भएको खेलमा अर्को नवप्रवेशी एफसी खुमलटारलाई एन्फा कम्प्लेक्स सातदोबाटोमा ३-१ गोलले पराजित गर्यो। चर्च ब्वाइजको जितमा आषिस चौधरीले दुई गोल गरे।
खेलको ११ मिनेटमा आषिसले गोल गर्दै चर्च ब्वाइजलाई अग्रता दिलाए। १८ मिनेटमा एरिक विष्टले चर्च ब्वाइजको अग्रता दोब्बर पारेका थिए।
४० मिनेटमा खुमलटारका लागि मेसौकेले गोल गर्न सफल भए।
७१ मिनेटमा आषिसले व्यक्तिगत दोस्रो तथा टिमका लागि तेस्रो गोल गरेपछि चर्च ब्वाइज जिततर्फ अघि बढेको थियो।
यता च्यासल मैदानमा भएको खेलमा थ्रीस्टार क्लब र फ्रेन्ड्स क्लबले ३-३ गोलको बराबरी खेलेका छन्। खेलको तेस्रो मिनेटमै थ्रीस्टारका लागि अजयी मार्टिन्सले गोल गर्न सफल भएका थिए।
१४ मिनेटमा फ्रेन्ड्सका कुशल फुयालले बराबरी गोल फर्काए।
२४ मिनेटमा योगेश गुरुङले गोल गरेपछि थ्रीस्टारले खेलमा दोस्रो पटक अग्रता लियो।
तर पहिलो हाफ सकिन दुई मिनेट बाँकी छदा उक्तमोभले गोल गर्दा फ्रेन्ड्सले खेलमा दोस्रो पटक बराबरी गर्यो।
८७ मिनेटमा थ्रीस्टारका लागि प्रदीप लम्सालले गोल गर्दा खेल ३-२ को अवस्थामा पुगेको थियो।
तर इन्जुरी टाइमको दोस्रो मिनेटमा कुशलले व्यक्तिगत दोस्रो र फ्रेन्ड्सका लागि तेस्रो गोल गर्दा खेलमा ३-३ को बराबरी भएको थियो।
