सहिद स्मारक ए डिभिजन लिगमा हिमालयन शेर्पाले नेपाल पुलिस क्लबमाथि रोमाञ्चक जित हात पारेको छ।
बुधबार दशरथ रंगशालामा भएको खेलको दोस्रो हाफको इन्जुरी टाइमको सातौं मिनेटमा गोल गर्दै हिमालयन शेर्पाले १-० गोलको रोमाञ्चक जित निकालेको हो।
शेर्पाका लागि अन्तिम मिनेटमा अमृत श्रेष्ठले गोल गरेका थिए।
त्यसअघि पहिलो हाफमा नेपाल पुलिस क्लबका गोलकिपर शत्रुघन चौधरीले शेर्पाका निशान लिम्बूले प्रहार गरेको पेनाल्टी विफल बनाएका थिए।
लिगमा पुलिसको लगातार दोस्रो हार हो भने अघिल्लो खेलमा बराबरीमा रोकिएको शेर्पाको पहिलो जित हो।
यता च्यासल मैदानमा भएको खेलमा सातदोबाटो युथ क्लबले नेपाल एपिएफ क्लबलाई १-० गोलले पराजित गरेको छ।
सातदोबाटोका लागि खेलको ५५ मिनेटमा विलियम असिडेउले गोल गरेका थिए।
लिगमा सातदोबाटोले लगातार दोस्रो जित हात पारेको हो। पहिलो खेलमा जित निकालेको एपिएफ भने सिजनको दोस्रो खेलमा पराजित भयो।
