सहिद स्मारक ए डिभिजन लिगमा नेपाल पुलिस क्लब लगातार तेस्रो खेलमा पराजित भएको छ।
पुलिसलाई शनिबार च्यासल मैदानमा भएको खेलमा संकटा क्लबले ३-० गोलले हरायो। संकटाको जितमा गणेश हमालले १२औं मिनेटमा पहिलो गोल गरे।
८० मिनेटमा रोशन पहरीको गोलबाट संकटाले अग्रता दोब्बर पार्यो। ८६ मिनेटमा सुरज जिउ ठकुरीले तेस्रो गोल गर्दा खेल संकटाको पक्षमा गयो।
अघिल्ला दुई मध्ये एक खेलमा बराबरी र एक खेलमा पराजित भएको संकटाले सिजनमा पहिलो जित हात पारेको हो।
यता दशरथ रंगशालामा भएको खेलमा नेपाल एपिएफ क्लब र जावलाखेल युथ क्लबले गोलरहित बराबरी खेलेर अंक बाँडेका छन्।
खेलमा एपिएफले ६ प्रहार पोस्टमा गरे पनि गोल गर्न भने सकेन। जावलाखेलले भने एक प्रहार मात्र पोस्टमा गरेको छ।
अघिल्ला दुई खेलमा जित निकालेक जावलाखेल तेस्रो खेलमा भने बराबरीमा रोकियो। एपिएफ भने एक खेलमा जित निकाल्दा एक खेलमा पराजित भएको थियो।
