इंग्लिस प्रिमियर लिगको शीर्षस्थानमा रहेको आर्सनलले पुनः ५ अंकको अग्रता बनाएको छ।
गएराति घरेलु टोली फुलहममाथि ३-० को सानदार जित निकाल्दै लन्डन क्लबले आफ्नो शीर्षतालाई थप बलियो बनाएको हो।
क्राभेन कटेज फुलहममा आइतबार राति आर्सनललाई जिताउन गाब्रिएल, गाब्रिएल मार्टिनेली र कप्तान मार्टिन ओडेगार्डले गोल गरेका थिए। तीन गोलमा नै लियान्द्रो ट्रोसार्डले असिस्ट प्रदान गरेका थिए।
खेलको २१औं मिनेटमा गाब्रिएलले गोल गर्दै आर्सनललाई सुरूआती अग्रता दिलाए। २६ औं मिनेटमा गाब्रिएल मार्टिनेलीले गोल गर्दै आर्सनलको अग्रता दोब्बर पारे।
पहिलो हाफको इन्ज्युरी समयमा कप्तान मार्टिन ओडेगार्डले गोल गर्दै टोलीलाई सानादार अग्रता दिलाए।
तर दोस्रो हाफमा सुधारिएको प्रदर्शन गरेको घरेलु टोलीले केही राम्रा अवसर सिर्जना गरे पनि सदुपयोग गर्न नसक्दा आर्सनलले पहिलो हाफको अग्रता जोगाउँदै जित निकाल्यो।
यो जितसँगै शीर्षस्थानको आर्सनलको २७ खेलबाट ६६ अंक पुगेको छ। आर्सनलले दोस्रो स्थानको म्यानचेस्टर सिटीसँग ५ अंकले अग्रता बनाएको छ। सिटीको समान खेलबाट ६१ अंक छ।
पराजित फुलहम ३९ अंक जोडेर आठौं स्थानमा कायमै छ।
