ओलावाले अफिजले दुई गोल गरेपछि साविक विजेता मछिन्द्र क्लबले सहिद स्मारक ए डिभिजन लिगमा पहिलो जित दर्ता गराएको छ।
अघिल्ला तीन खेलमा जित निकाल्न नसकेको मछिन्द्रले चौथो खेलमा नेपाल पुलिस क्लबमाथि २-१ गोलको जित निकालेको हो।
यता पुलिस भने लगातार चार खेलमा पराजित भयो।
खेलमा अग्रता भने पुलिसले लियो। पुलिसका लागि अञ्जन राईले नवौं मिनेटमा पहिलो गोल गरे।
मछिन्द्रका लागि ओलावालेले २० मिनेटमा बराबरी गोल फर्काए। ४० मिनेटमा उनले दोस्रो गोल गरेपछि मछिन्द्रले २-१ गोलले अग्रता लियो।
लिगमा मछिन्द्रले चार अंक जोडेको छ भने पुछारको पुलिस अंकविहीन छ।
